SMSRADAR xidmətinə qoşulmaq üçün qeydiyyatdan keçdiyiniz zaman tətbiq olunan qaydalar:
1 . SMSRADAR xidmətində hər əlavə etdiyiniz avtomobilə görə balansınızdan 1 AZN (ƏDV daxil) məbləğ çıxılacaq.
2 . Abunəlik müddəti 30 gün intervalla hesablanır. Xidmətdən imtina etmədiyiniz müddətdə abunəliyiniz avtomatik olaraq hər ay yenilənəcək və balansınızdan 1 AZN (ƏDV daxil) məbləğ çıxılacaq.
3 . Hər hansı bir şəxsin razılığı olmadan ona məxsus avtomobilin məlumatları ilə qeydiyyatdan keçmək qadağandır! Bu kimi hallar aşkarlanarsa qanunvericiliyə uyğun olaraq məsuliyyət daşıyırsınız.
4 . Siz razıyam seçimini etdikdən sonra yuxarıda göstərilən qaydaları qəbul etmiş sayılırsınız.
Elanların Yerləşdirilməsi Qaydaları
1. Ümumi Müddəalar
1.1. https://www.smsradar.az/ saytında (bundan sonra – Sayt) elan yerləşdirilməsi İstifadəçi Razılaşması (bundan sonra - Razılaşma) və bu Qaydalarla tənzimlənir.
1.2. Bu Qaydaların məqsədləri üçün istifadə edilən terminlər və ifadələr Razılaşmada müəyyən edilən mənalarda işlədilmişdir.
1.3. Bu Qaydaların, habelə Razılaşmanın tələblərinin pozulması və ya reklam üzrə istifadəçilərin çoxsaylı şikayətləri müvafiq elanın və onun sahibinin qeydiyyat hesabının bloklanması ilə nəticələnə bilər.
1.4. Əlavə xidmətlərin (Premium, VIP və digər) onlara tətbiq edilib-edilməməsindən asılı olmayaraq, bütün elanlar bu Qaydalara uyğun olmalıdır. Qaydaların pozulması halında ödəniş olunmuş elanlar da blok oluna və ya silinə bilər.
1.5. Servisin bütün istifadəçiləri üçün bərabər şəraitin təmin edilməsi məqsədilə hər kəs elan yerləşdirməzdən əvvəl Razılaşma və bu Qaydalarla tanış olub, onların tələblərinə riayət etməlidir.
2. Elanların Yerləşdirilməsi
2.1. Elan yerləşdirmə, yeniləmə və digər ödənişli xidmətlərin qiymətləri dəyişə bilər. Ən son və qüvvədə olan qiymət məhz ödəniş zamanı sistem tərəfindən göstərilən qiymət olacaq və bu qiymət əsas götürüləcək. İstifadəçilər ödəniş etməzdən əvvəl göstərilən qiymətlə diqqətlə tanış olmalıdırlar.
2.2. Nəqliyyat vasitəsinin (bundan sonra - NV) satılması barədə elanın Saytda olma müddəti 30 gündür və bunun üçün ödəniş tələb edilmir.
2.3. İstifadəçi ilk elanı yerləşdirdikdən sonra 90 gün ərzində yeni elan yerləşdirmək istədikdə, ikinci və sonrakı hər elan üçün ödəniş tələb olunur. Növbəti elanların da Saytda olma müddəti 30 gündür.
2.4. İlk elanın və ya növbəti elanların Saytda olmasının 30 günlük müddəti bitdikdən sonra NV satılmayıbsa, istifadəçi hər elan üçün ödəniş etməklə növbəti 30 gün elanın (elanların) Saytda olmasını təmin edə, yaxud ödənişli xidmət seçməklə xidmətin müddətində elanın (elanların) Saytda olmasını təmin edə bilər.
2.5. Elandakı NV barəsindəki məlumatlara icazə verilən qaydada dəyişiklik edilməsi, yaxud elandakı təkliflərdəki dəyişikliklər yeni elan sayılmır. Lakin elandakı NV-nin başqası ilə əvəz edilməsi (eyni marka və model olsa da) yeni elan sayılır.
2.6. Saytda yerləşdirilmiş elanda NV haqqında məlumatları və şəkilləri başqa NV-nə aid məlumatlarla və şəkillərlə əvəz etmək qadağandır.
2.7. İstifadəçi Saytda bir NV barəsində eyni vaxtda iki və ya daha çox elan yerləşdirdikdə, həmin elanların hamısı silinir. Bundan sonra həmin elanlardan birini bərpa etmək və ya həmin NV barədə yeni elanı yerləşdirmək istəyən İstifadəçi müvafiq ödəniş etməlidir.
2.8. Müddəti bitdiyinə və ya bu Qaydalarda nəzərdə tutulan hallarda silinən istənilən elanın bərpası üçün ödəniş edilməlidir.
2.9. Ödənişli xidmət qaydasında yerləşdirilən elan xidmətin razılaşdırılmış müddətində Saytda olur. Müddət bitdikdən sonra yeni razılaşmaya uyğun olaraq belə elanın müddəti uzadıla bilər.
2.10. Administrasiya tərəfindən müəyyən olunan şərtlər əsasında Saytda “Sifarişli” elan yerləşdirmək olar. Belə elan İstifadəçinin anbarında olmayan NV barəsində verilə bilər.
2.11. “Sifarişli” elan yerləşdirmək imkanı yalnız ölkədəki və ya xaricdəki NV istehsalçılarının rəsmi nümayəndələrinə (dilerlərinə), habelə avtomobil idxalçılarına yaradılır. “Sifarişli” elanların yerləşdirilməsi və bərpası yalnız aktiv biznes paketi çərçivəsində mümkündür.
2.12. “Sifarişli” elan yerləşdirmək istəyən İstifadəçi "Sifarişli" elan yerləşdirmək imkanını əldə etmək üçün tələblərlə və “Sifarişli” elan üzrə NV təqdim edən İstifadəçilərin öhdəlikləri ilə tanış olmalı və onlara riayət etməlidirlər.
2.13. Barəsində “Sifarişli” elan yerləşdirilmiş NV-ni almaq istəyən İstifadəçilərə Sifariş üzrə avtomobil alan alıcı üçün tövsiyələrlə tanış olmaq və bundan sonra müvafiq sövdələşmə etmək tövsiyə olunur.
2.14. “Sifarişli” elanlar yerləşdirmək hüququna malik olan İstifadəçilər ümumi şərtlər daxilində anbarlarında (sərəncamlarında) olan NV-lər barəsində adi elanlar yerləşdirə bilərlər.
3. Barəsində Elan Yerləşdirilən NV-nin Şəkillərinə Dair Tələblər
3.1. Hər bir NV barəsindəki elanda şəkillərin minimal sayı 3, adi istifadəçilər üçün maksimal sayı 25, biznes istifadəçiləri üçün isə 50 olmalıdır. Qəzalı NV üçün şəkil sayı 1 ədəd də ola bilər. Minimal olaraq NV-nin ön hissəsinin, arxa hissəsinin və salonunun ön hissəsinin şəkilləri olmalıdır.
3.2. Şəkillərin minimal ölçüsü 1024x768 piksel olmaqla, onlar keyfiyyətli olmalıdır. Montaj edilmiş və ya xüsusi effektlərlə dəyişdirilmiş şəkillərin Saytda yerləşdirilməsinə yol verilmir.
3.3. Qaranlıqda çəkilmiş şəkillər yalnız NV kənar süni işıqla kifayət qədər işıqlandırıldıqda qəbul edilir.
3.4. “Skrinşot” yolu ilə əldə edilən şəkillər, habelə çərçivədə olan, habelə ağ-qara (rəngsiz) şəkillər dərc olunmur.
3.5. “Sifarişli” elanlar istisna olmaqla, NV-nin şəkli Azərbaycan Respublikası ərazisində çəkilməlidir.
3.6. Şəkillərdə Saytın loqotipi və ya hər hansı başqa bir loqotip olmamalıdır.
3.7. Şəkillərin aşağı-yuxarı və sağ-sol xətləri müvafiq olaraq tam üfiqi və şaquli olmalıdır (bucaq altında çəkilən şəkillərdən istifadəyə yol verilmir).
3.8. Şəkillərdə NV-nin dövlət qeydiyyat nişanını (nömrəsini) və insanları gizlətmək üçün stikerlərin və smaylların istifadəsinə yol verilmir.
3.9. Şəkillərdə reklam xarakteri daşıyan məlumat olmamalıdır.
3.10. Şəkillərdə əlaqə vasitələri (telefon nömrələri, sosial şəbəkə hesabları və s.) əks olunmamalıdır.
3.11. Hər hansı avtosalonda çəkilmiş şəkillər yalnız həmin avtosalonun adından verilən elanlarda yerləşdirilə bilər.
3.12. Başqa şəxslərin NV-nin şəkillərinin, habelə internetdən götürülən şəkillərin yerləşdirilməsinə yol verilmir.
3.13. NV-nin rəngi şəkildə aydın görünməlidir.
3.14. Şəkillərdə NV-nin son mövcud olan real vəziyyəti əks olunmalıdır.
3.15. Qəzalı NV barədə elan yerləşdirən İstifadəçi onun qəzalı olduğunu şəkildə mütləq qeyd etməlidir. Belə halda elanın üzərində “Qəzalı” nişanı yer alacaq.
3.16. “Sifarişli” elanlar üçün şəkillər Azərbaycan Respublikasının ərazisində, yaxud xaricdə və ya konfiquratordan (yalnız rəsmi nümayəndələr (dilerlər) tərəfindən verilən elanlarda) istifadə etməklə çəkilə bilər. NV-nin şəkli Azərbaycan ərazisində çəkilibsə, şəkildəki ilə eyni olan yeni və ya bir ildən çox istismarda olmamış NV-lər üçün sifariş qəbul edilərək belə NV-lər ölkəyə gətirilməlidir.
3.17. “Sifarişli” elanlar üçün şəkil olaraq başqa saytların loqosu ilə şəkillər əlavə edilə bilməz.
3.18. "Sifarişli" elandakı şəkillərin minimal sayı 9 olmalıdır: xaricdən NV-nin sol, sağ, ön və arxa tərəflərinin, daxildən isə ön və arxa (əgər varsa) oturacaqların, salonun ön panelinin, qapısı açılmaqla arxa yük yerinin (əgər varsa) və kapotun altının şəkilləri.
3.19. Eyni şəkilli "Sifarişli" elanların Saytda yerləşdirilməsinə yol verilmir.
3.20. "Sifarişli" elan NV-nin müxtəlif konfiqurasiyalı bir neçə variantına aiddirsə, istifadəçi fərqli variantlar barədə məlumatları elanın əlavə məlumat bölməsində göstərə bilər.
4. Elanda Qiymətin Göstərilməsi Qaydaları
4.1. Saytda yerləşdirilən elanda NV-nin qiyməti ilə bağlı məlumatların göstərilməsi Saytın daxili qaydaları ilə tənzimlənir.
4.2. NV kreditlə təklif edilirsə və ya onun barəsində artıq sənədləşdirilmiş kredit varsa, kredit şərtləri elanın təsvirində qeyd olunmalıdır.
4.3. “Sifarişli” NV-lərin təklif edilən qiyməti Azərbaycan Respublikasına çatdırılma xərcləri, gömrük ödənişləri, habelə digər xərclər daxil edilməklə yekun qiymətə mümkün qədər yaxın olmalıdır.
4.4. NV-nin qiyməti ilə bağlı İstifadəçi tərəfindən qəsdən yanlış məlumat verildiyi və qiymətdə manipulyasiya cəhdi olduğu halda, Sayt öz qaydalarına uyğun olaraq məhdudiyyət tədbirləri görə bilər. Bu tədbirlərə Sayta elan yerləşdirmək üçün girişin məhdudlaşdırılması və istifadə olunmamış xidmətə görə vəsaitin geri qaytarılmaması da daxildir.
5. Elanın Təsvir Hissəsinə Aid Tələblər
5.1. Elanın təsvir hissəsində mobil nömrə və ya digər əlaqə məlumatı daxil etməyə yol verilmir.
5.2. Elanın təsvir hissəsində olan məlumatda təhqiramiz ifadə və reklam xarakterli məlumat olmamalıdır.
5.3. Təsvirdə göstərilən məlumat xanada qeyd olunan məlumata uyğun olmalıdır.
6. İstifadəçinin Əlaqə Vasitələrinin Göstərilməsi Qaydaları
6.1. Elanda İstifadəçinin aşağıdakı şəxsi əlaqə vasitələri düzgün qeyd olunmalıdır:
6.1.1. onun adı;
6.1.2. onun telefon nömrəsi.
6.2. Elan Saytda yerləşdirildikdən sonra telefon nömrəsi ilə bağlı heç bir dəyişiklik həyata keçirilmir.
6.3. Elanda hər hansı dəyişiklik etmək üçün İstifadəçi müvafiq təlimatlara əməl etməlidir. Dəyişikliklə bağlı təlimatlar telefon nömrənizə göndərilə bilər və bu halda müvafiq ödəniş tələb oluna bilər.
6.4. Elanda telefon nömrəsi səhv qeyd olunubsa, həmin elan Saytdan silinir.
6.5. Yerləşdirdiyi elanın dəqiqliyinə, tamlığına, onun Azərbaycan Respublikasının Qanunvericiliyinə uyğunluğuna görə İstifadəçi cavabdehdir.
6.6. Elandakı məlumatların üçüncü şəxslərin hüquqlarını pozmamasına, yaxud üçüncü şəxslərin bu elanla bağlı iddialarına görə İstifadəçi məsuliyyət daşıyır.
7. Elanda Düzəliş Edilməsi Qaydası
7.1. Elanda düzəliş etmək üçün elana daxil olmaq və “Düzəliş et” düyməsini basmaq lazımdır.
7.2. Saytda dərc edilməmiş elanlarda düzəliş etmək mümkün deyil.
7.3. Elanda bir gün ərzində yalnız iki dəfə dəyişiklik etməyə icazə verilir.
7.4. Saytdakı elanda aşağıdakı məlumatlarla bağlı heç bir dəyişikliklər həyata keçirilmir:
7.4.1. İstifadəçinin Əlaqə Vasitələri Barədə Məlumatlar;
7.4.2. Barəsində Elan Verilmiş NV-nin Marka, Model, Buraxılış İlinə Dair Məlumatlar.
7.5. Düzəliş edilmiş elan qaydalara uyğun olmadıqda, edilmiş düzəliş qəbul olunmur.
7.6. Edilmiş düzəlişdən sonra elan bir saat ərzində yoxlamadan keçirilir.
8. Saytın “Qara Siyahı”sı
8.1. Saytdan istifadənin və elan yerləşdirmənin qaydalarının pozulmasının aşağıda göstərilən hallarında, həmin İstifadəçi barədə məlumatlar və onun əlaqə vasitələri Saytın “Qara siyahı”sına daxil edilir, həmin əlaqə vasitələri blok olunur və onun Saytdan istifadəsi (o cümlədən elan yerləşdirməsi) qeyri-mümkün olur:
8.1.1. İstifadəçi Saytın əməkdaşlarına (operatora və ya moderatora) qarşı hörmətsizlik etdikdə;
8.1.2. İstifadəçi onunla əlaqə saxlayan şəxsə elanda qeyd etdiyindən fərqli məlumat verdikdə;
8.1.3. İstifadəçi başqa NV-nin şəkillərini yerləşdirdikdə və ya şəkillər vasitəsilə istifadəçiləri yanıltmaq üçün hər hansı digər qaydaları pozduqda;
8.1.4. İstifadəçi “Təkrar elan” xidmətinin qaydalarını pozduqda ona bir dəfə xəbərdarlıq edilir. Həmin xəbərdarlıqdan sonra İstifadəçi “Təkrar elan” xidmətinin qaydalarını təkrarən pozduqda;
8.1.5. Avtosalon və ya ticarət fəaliyyəti ilə məşğul olan İstifadəçi kimi qeydiyyata düşməmiş İstifadəçi (adi istifadəçi) tərəfindən yerləşdirilmiş elandakı NV-nin avtosalon tərəfindən satılması halları aşkar olunduqda. Belə halda elan silinir və ödənilən pul geri qaytarılmır.
8.2. İstifadəçi barədə məlumatların və onun əlaqə vasitələrinin “Qara siyahı”dan çıxarılmasına yol verilmir.
8.3. İstifadəçi öz elanında kənar şəxsin əlaqə vasitələrini qeyd edildikdə və həmin şəxs bundan şikayət etdikdə belə yanlış məlumatı yerləşdirən şəxsin əlaqə vasitələri “Qara siyahı”ya düşür.
9. Avtosalonlara Və NV Ticarəti Ilə Məşğul Olan Digər Şəxslərə Aid Tələblər
9.1. Avtosalonlar və NV ticarəti ilə məşğul olan digər şəxslər (bundan sonra-ticarətlə məşğul olanlar) Servisdə müəyyən edilmiş qaydada ticarət fəaliyyəti ilə məşğul olan şəxslər kimi hesab açmalıdırlar.
9.2. Sayt və ya Administrasiya tərəfindən İstifadəçinin NV ticarəti ilə məşğul olduğu aşkarlanarsa, onun şəxsi hesabı ticarət fəaliyyəti ilə məşğul olan şəxslər üçün nəzərdə tutulmuş hesaba keçiriləcək.
9.3. Bu Qaydaların bütün tələbləri ticarətlə məşğul olanlara da şamil olunur.
9.4. Ticarətlə məşğul olanlar üçün hər elanın yerləşdirilməsi ödənişlidir.
9.5. Elanın bərpası ödənişlidir.
9.6. Yalnız bir və ya bir neçə NV markasının dileri və ya distribütoru rəsmi statusuna sahib olan avtosalon həmin marka adından Saytda rəsmi nümayəndə və ya diler kimi hesab yarada bilər. Sayt həmin avtosalonların əsas istehsalçılardan və ya distribütorlardan avtomobil satışını həyata keçirməyə imkan verən rəsmi icazəsi olmasını yoxlamaq hüququna malikdir.
9.7. Saytda rəsmi nümayəndələrin (dilerlərin) olması potensial alıcılara birbaşa istehsalçıdan satılan avtomobilləri əldə etmək imkanı yaradır.
9.8. Saytda rəsmi nümayəndə (diler) statusu ilə elanlar yerləşdirmək üçün avtosalon aşağıdakı meyarlara uyğun olmalıdır:
9.8.1. həmin markanın rəsmi saytında nümayəndəlik barədə məlumat olmalıdır;
9.8.2. avtosalonun həmin istehsalçının və ya distribütorun NV-ni satmaq üçün rəsmi icazəsi olmalıdır, yaxud istehsalçı və ya distribütordan bu avtosalonun rəsmi nümayəndə olması barədə təsdiqedici sənəd olmalıdır.
9.9. Müvafiq markanın satışı ilə məşğul olan qeyri-rəsmi nümayəndələrə əqli mülkiyyət hüququ sahiblərinin (yəni istehsalçının və ya distribütorun) icazəsi olmadan onların loqotiplərindən və simvolikalarından istifadə etmək qadağan edildiyindən belə avtosalonlar Saytda hesab yaradarkən öz adlarında və ya avtosalon barədə məlumatda "diler", "rəsmi diler" və "distribütor" ifadələrini istifadə edə bilməzlər.
9.10. Rəsmi nümayəndə (diler) adından elan yerləşdirmək üçün ödənişli paketlərdən biri əldə olunmalıdır. Hər paketin müəyyən elan sayı (balansı) mövcuddur. Paket bir ay ərzində aktivdir. Paketdə nəzərdə tutulmuş elan limiti balansı bitdikdə, hər növbəti elan üçün əlavə ödəniş tələb olunur.
9.11. Rəsmi nümayəndələr (dilerlər) Saytda multibrend səhifə yarada bilməzlər. Onlar təmsil etdikləri hər bir NV markası üçün ayrıca səhifə yaratmalıdırlar. Rəsmi nümayəndə olmayan ticarətlə məşğul olanlara bu bəndin qaydası şamil olunmur.
9.12. Ticarətlə məşğul olanlar adından yerləşdirilmiş elanın bərpası üçün ödənişli elanların balansından istifadə olunması mümkündür. Ödənişli elanların balansı bitdikdə, hər bir elanın bərpası üçün ödəniş tələb olunacaq.
10. Avtosalonlara Və NV Ticarəti Ilə Məşğul Olan Digər Şəxslər Üçün Ümumi Şərtlər Və Xidmətlər
10.1. Paketin daxilində “Avtosalon” üçün brendləşdirilmiş şirkət səhifəsi təqdim olunur.
10.2. Paketin daxilində xidmətin göstərilməsi üzrə şəxsi köməkçi ayrılır.
10.3. Paketin istifadə müddəti 30/60/90 gün nəzərdə tutulur.
10.4. Cari paket yeniləndikdə xidmətin bitmə müddəti yeni paketin xidmət müddəti ilə əvəzləşdirilir.
10.5. Qiymətlər ƏDV daxil olmaqla AZN ilə göstərilib.
10.6. Banner göstəriş yeri icraçı tərəfindən təyin olunur.
10.7. Banner reklam keçidi avtosalonun online səhifəsinə yönləndirilir.
10.8. Kommersiya şərtləri: qiymət və ümumi şərtlər öhdəliklər tam icra olunanadək qüvvədədir.
10.9. Paket deaktiv edildikdə, əlaqəli komponentlər – ödənişli elanlar, ödənişli xidmət balansı sıfırlanır, endirim, avtosalon səhifəsi və elanları sistemdən çıxarılır.
10.10. Paketin alınması hallarında ödənilmiş məbləğ geri qaytarılmır.
10.11. Paket əsassız olaraq deaktiv edildikdə, ödənilmiş məbləğ geri qaytarılır.
10.12. Aylıq xidmət haqqı təqdim edilən hesab-faktura əsasında 100% avans şəkildə ödənilir.
11. Saytın Texniki Dəstək Xidməti
11.1. Saytın texniki dəstək xidmətinin telefonları həftədə 7 gün saat 09:00-dan 18:00-a qədər işləyir.
11.2. Saytın texniki dəstəyinə müraciət etdikdə elan nömrəsi mütləq qeyd olunmalıdır. Elanın nömrəsi elan yerləşdirilən zaman sizə təqdim olunur.
12. Cərimə, Parking və digər ödənişlərinin edilməsi üçün texniki imkan və kart məlumatlarının saxlanması.
12.1. Sayt istifadəçilərinin rahatlığını təmin etmək üçün cərimə, parking və digər ödənişlərin ödənilməsi üçün imkan yaratmaq məqsədilə api.az saytı ilə əməkdaşlıq edir. Bu əməkdaşlıqda Saytın rolu istifadəçilərə api.az tərəfindən təqdim edilən texniki imkan barədə məlumat təqdim edilməsi, api.az saytına keçidin (linkin) yerləşdirilməsi və bununla bağlı inteqrasiyanın təmin edilməsindən ibarətdir.
13.Məsuliyyət.
13.1. Saytın Administrasiyası Saytın qaydalarının bilərəkdən pozulması halları olduqda İstifadəçi ilə (o cümlədən ticarətlə məşğul olanlarla) müqaviləni ləğv etmək hüququna malikdir. Bu halda ödənilən pul geri qaytarılmır.
13.2. Saytda elan yerləşdirilməsi zamanı bu Qaydaların pozulmasına yol verilibsə, haqqı ödənilmiş elanlar da ləğv edilə bilər.
13.3. Xidmətin göstərilməsindən sonra ödənişli xidmətlərə görə ödənilmiş haqq geri qaytarılmır. Eləcə də xidmətin göstərilməsinin başlama vaxtı daha sonraya və ya əvvələ dəyişdirilə, yaxud xidmət başqa elana keçirilə bilməz.
13.4. Elan silindikdə İstifadəçinin elanı dərc edərkən göstərdiyi əlaqə vasitəsinə hər bir dərc olunmamış elana görə elanın silinməsinin səbəbini izah edən avtomatik servis bildirişi (mesajı) göndərilir.
13.5. Saytda yerləşdirilmiş hər hansı bir məlumatı, materialı və şəkli Administrasiyanın yazılı icazəsi olmadan istifadə etmək qanunsuz hesab ediləcək və buna görə Azərbaycan Respublikasının Qanunlarına əsasən məsuliyyət yaranacaq.
13.6. Saytın rəhbərliyi bu Qaydalara istənilən vaxt birtərəfli qaydada, öncədən məlumat vermədən (xəbərdarlıq etmədən) dəyişiklik etmək hüququna malikdir.
14.1. SMSRadar mobil tətbiqində istifadəçilərə ödənişlərin həyata keçirilməsi məqsədilə bank kartlarını əlavə etmək imkanı təqdim olunur.
14.2. Bank kartlarının tam rekvizitləri, o cümlədən kart nömrəsi, son istifadə tarixi və CVV/CVC təhlükəsizlik kodu SMSRadar tərəfindən saxlanılmır SMSRadar -in serverlərində emal edilmir.
14.3. Kart məlumatlarının daxil edilməsi, emalı və zəruri hallarda saxlanılması müvafiq bank və/və ya ödəniş xidməti provayderinin təhlükəsiz infrastrukturu vasitəsilə həyata keçirilir.
14.4. Kartın tətbiqdə yadda saxlanılması funksiyasından istifadə edildikdə,SMSRadar kartın tam rekvizitləri əvəzinə bank və/və ya ödəniş xidməti provayderi tərəfindən təqdim edilən unikal identifikator və ya token vasitəsilə sonrakı ödəniş sorğularını həyata keçirə bilər.
14.5. SMSRadar istifadəçilərin bank kartlarının CVV/CVC kodlarını saxlamır və bu məlumatlara çıxış əldə etmir.
14.6. Bank kartları ilə aparılan əməliyyatların təhlükəsizliyi və kart məlumatlarının emalı müvafiq bankın və/və ya ödəniş xidməti provayderinin tətbiq etdiyi təhlükəsizlik standartları və qaydaları çərçivəsində həyata keçirilir.
14.7. İstifadəçi SMSRadar tətbiqinə bank kartı əlavə etməklə və kart vasitəsilə ödəniş həyata keçirməklə kart məlumatlarının ödənişin icrası məqsədilə müvafiq bank və/və ya ödəniş xidməti provayderi tərəfindən emal edilməsinə razılıq verir.
